（英白）呀！侬果然是金春哥哥。

（春白）凤英妹。

（英白）金春哥！

（春白）凤英妹！

（英唱）自从哥哥充军去，我是日夜在家哭勿停。可恨爷叔将我卖，卖到此地张家做小星，我几次想回转娘家打听侬消息，可恨丈夫不许我出门。哥哥呀！六年来侬一定比我还要苦……

（春唱）六年来，十日八夜讲勿尽，那年捉进衙门里，四十板子打上身。我问伊金春犯啥罪？伊说我，勾引闺女有罪名，他更不该说我抢侬爷叔雪花银。我说道，侬勿要得仔钱财冤枉人，瘟官闻听冲大怒，重重刑具上我身：踏杠子、用夹棍，火链条烫我后背心，拿我屈打成招口供认，罪加一等判充军。充军充到关外地，一路上饥寒交迫我生了病，解差凶得如山虎，还要拿我重重皮鞭抽上身。

（英白）伊拉害得侬好苦啊！

（春唱）我带病走到张家口，县官摆堂再审问，伊问我银子有勿有，我说道穷人只有一条命，伊就此判我五年刑，

（白）戴手铐，上脚镣，

（唱）将我关进监牢门。

（白）我勒拉监牢里，

（唱）几次想逃逃勿成。哼！他们只能关住我的身，但是关不住我的心。种种苦楚我能受，妹妹呀，我只怕耽误侬妹终身。

（白）妹妹，

（唱）去年腊月刑期满，拿我放岀监牢门，我身无分文难活命，沿途乞讨回转门。想煞侬凤英将我等，我起早落夜脚步奔，谁知一到家乡地，

（白）?狠心的爷叔，

（唱）将侬卖到水云亭。

（白）妹妹，

（唱）当初侬在娘家地，面带笑容红润润，像正月梅花、二月杏花、三月桃花，三等四样花颜色，到如今像四月菜花黄澄澄，问妹妹，六年光阴侬哪能过？

（英唱）提起此事更伤心。自从踏进张家门，我好比头顶石臼脚踏针。伊拉讨我想生男育女传后代，因为我勿养，当我像脚下泥蓬尘，我做人比牛马还要苦，早做夜做张家还勿称心。公婆刻薄难服侍，讲我穷人家出身听好命，叫我人前人后低头走，吃粥吃饭勿许我上台凳。大娘当我像出气洞，冷言冷语骂勿停，丈夫当我像奴婢，一个勿对就拳打脚踢勿留情。

（春唱）劝妹莫要流眼泪，眼泪难洗心头恨，问妹妹侬今后打算如何办？

（英白）今后？

（春唱）妹妹侬还年纪轻，倘然侬再在张家蹲，往后痛苦更加深，难道侬情愿苦一世？

（英唱）我也想欢欢乐乐过光阴，可是我虽有心来不由身。

（春白）不！

（唱）黄连虽苦甘草拌，荒山也有同路人。妹妹身挑千斤担，我愿分挑五百斤。我勿忍看侬再受苦，

（白）妹妹呀，

（唱）侬还是跟我离开张家门。

（英白）走？

（春白）走！

（英白）可是走仔以后，

（唱）岂不要连累你哥哥身？并非小妹勿肯走，哥哥呀，侬要三思忖。我丈夫有财称乡绅，爷叔有势他做保正，虽能推倒此地砖头墙，可是难逃这前面县衙门。小妹忍受千般苦，

（春白）勿，

（唱）难道就此甘了心！我今朝见侬受此苦，金春已拿主意定，我要救侬岀火坑门，哪怕杀头再充军！

（白）妹妹，你跟我走！

（英白）走，可是走到啥地方去？

（春唱）常言道鸟飞千里无阻拦，荒年饿勿煞手俭人。我害侬受尽六年苦，我再害侬一世心勿忍。倘然侬跟我金春走，伲苦苦恼恼一道蹲。我垦荒地侬烧饭，我做生意侬当秤，我为了侬妹妹今后想，哪怕我讨饭养活侬无怨心。我双手劈开生死路，康庄大道等侬行。

（英唱）哥哥劈开生死路，康庄大道等我行。对，天上勿有跌煞鸟，地下勿有饿煞人。我伲尚还年纪轻，能扛能挑还能拎，倘然侬做摇船汉，我也能扭扭一根橹滨绳;倘然侬上山砍柴去，送茶送饭我担任。穷做穷来苦做苦，也呒没冷言冷语刺我心，就是穷得饭来讨，要比张家胜十分。打定主意跟侬走，走出张家火坑门，走出张家火坑门！哪怕是受饥受寒我也甘心。

（春白）伲走！

（英唱）我轻轻忙将门开出，

（春唱）远远看见三个人。

（英白）啊呀，勿好啦！

（唱）前后两个陌生人，当中就是我格当家人，真是蛇入曲洞无退步……

（春唱）劝妹妹侬安安胆来放落心，村口小桥已坍脱，兜过来还有半里路途程。

（英唱）眼看前门勿能走，哥哥呀，侬还是跟我走后门。小妹领侬前头走，

（春唱）后头跟我薛金春。

（英白）勿，勿对！

（唱）走后门也勿好，仍旧要碰着冤家对头人。前门后门只有一条路，今朝要走走勿成。

（春唱）要是伲今朝再勿走，到何年何月走得成”

（英唱）我倒有一个好主意，今朝是六月上三星，再过一月就是七月半，七月佳节庙会临，那一日全家都要去看庙会，家中只有我一个人。但等路上行人少，水云亭旁边将侬等，等侬哥哥一道走，从此离开火坑门。

（春唱）妹妹才情非常好，但等庙会到来临，不过遥遥相隔一个月，侬想金春我想凤英，我拣出红菱雌雄对，今朝权作表记赠。

（英唱）双手接过菱一对，我拿雌雄红菱分一分。哥哥拿一只雌红菱，妹妹留下雄红菱。哥有心来妹有情，哪怕千年万代永不分。狗叫一声近一声，哥哥啊，侬挑了担子快动身，小妹领侬前头走，我只能忍心拔闩推出门。

（春唱）我挑起担子跨步走，

（英唱）小妹送侬出后门。

（春唱）我劝妹留步莫远送，

（英唱）哥哥啊，你莫忘七月十五那一天……

（同唱）我俩相会在水云亭。